Un ano máis, conmemoramos o Día da Visibilidade Trans, pero nesta ocasión facémolo no medio dunha onda de odio sen precedentes. O avance dos discursos de odio fíxose máis visible que nunca. En pleno 2025, somos testemuñas de como dirixentes como Trump, Meloni, Orban e Milei verten discursos de odio, en contraste con máis de 50 anos de avances e loita trans pola igualdade real.
Atopámonos nun momento crucial no que a loita polos dereitos das persoas trans debe ser tallante e sen concesións, cunha forza que va máis aló das nosas fronteiras.
Como partido político, temos a responsabilidade de denunciar a campaña de odio á que as persoas trans se ven expostas, especialmente as mulleres trans e as persoas non binarias que expresan o seu xénero fóra das normas preestablecidas.
Esta campaña de odio cobrou forza nas redes sociais, especialmente en X (antes Twitter) e nas plataformas de META, onde se permite, sen opción a moderación, que as persoas LGTBIQA+, en particular as persoas trans, sexamos tratadas como enfermas, contradicindo así á OMS e a todas as sociedades científicas.
En Movemento Sumar Galicia, estamos a loitar para que o Congreso dos Deputados apoie a iniciativa presentada pola nosa presidenta e portavoz parlamentaria, Verónica M. Barbeiro xunto con varias outras deputadas do Grupo Parlamentario Plurinacional Sumar, hai unhas semanas. Esta proposta busca mellorar o sistema de asilo para garantir que todas aquelas persoas que sufrimos esta onda de discriminación atopemos en Europa, en España e en Galicia un refuxio de igualdade e protección legal fronte ao odio sen límite que padecemos noutros países e rexións.
En definitiva, pedimos responsabilidade social ao abordar a realidade trans.
Esiximos deslexitimar o debate fomentado pola ultradereita e a dereita do noso país e reclamamos que España e Galicia retomen o compromiso coa igualdade e o respecto aos dereitos trans, que en última instancia é o respecto aos dereitos humanos.
Así mesmo, esiximos que a Xunta de Galicia reforce o seu compromiso coa protección das persoas trans, que están sufrindo con maior intensidade esta onda de odio. Tamén demandamos que o presidente Rueda condene o discurso de odio dos seus aliados nos diferentes gobernos do PP e rexeite os discursos de odio de dirixentes europeos que se posicionan en contra das persoas trans.
Tamén na Unión Europea levaremos esta loita, da man da nosa eurodeputada Estrella Galán, que xa se dirixiu á Comisión para pedir medidas inmediatas para protexer e garantir os dereitos das persoas LGTBIQA+, especialmente as persoas trans, en todo o territorio comunitario.
VISIBILIDADE, RESPECTO E IGUALDADE.