Movemento Sumar Galicia valora positivamente a aprobación no Consello de Ministros do Real Decreto que garante de maneira efectiva o acceso universal á sanidade pública, poñendo fin á exclusión sanitaria que durante anos afectou ás persoas en situación administrativa irregular.
A formación lembra que en 2012 o Goberno do Partido Popular rompeu coa universalidade do sistema sanitario público ao deixar fóra da atención sanitaria a milleiros de persoas. En 2018 deuse un paso importante para recuperar ese dereito, pero seguían existindo lagoas administrativas que, na práctica, continuaban dificultando o acceso á sanidade a moitas persoas que viven no Estado.
Co novo Real Decreto péchase definitivamente esa fenda e garántese que o dereito á sanidade sexa real e efectivo para todas as persoas que viven no país, eliminando obstáculos burocráticos e clarificando os procedementos de acceso ao sistema público de saúde.
A nova norma establece que o acceso á sanidade pública será a opción por defecto, evitando trámites complexos ou interpretacións administrativas que ata agora xeraban exclusións. Ademais, garante a atención sanitaria desde o mesmo momento en que se presenta a solicitude para o recoñecemento do dereito, evitando esperas inxustificadas que deixaban a moitas persoas sen cobertura durante meses.
O decreto reforza tamén a protección de colectivos especialmente vulnerables, como menores de idade, mulleres embarazadas, persoas solicitantes de protección internacional ou vítimas de trata e de violencias sexuais, garantindo unha atención sanitaria plena e inmediata.
Outra das novidades é a eliminación da caducidade do documento de asistencia sanitaria para persoas en situación administrativa irregular, evitando que teñan que repetir constantemente os mesmos trámites administrativos para manter o acceso ao sistema público.
Movemento Sumar Galicia subliña que a sanidade pública universal é un dos piares fundamentais do Estado social e que garantir o acceso a todas as persoas non só é unha cuestión de dereitos humanos, senón tamén de saúde pública e de dignidade democrática.
Nun contexto no que o racismo e a extrema dereita cuestionan dereitos básicos, a organización defende con orgullo un sistema sanitario público universal que garante dereitos e coida a todas as persoas que viven no país sen excepcións.