Movemento Sumar Galicia da comarca de Pontevedra esixe ao Concello de Pontevedra a realización urxente das obras necesarias para corrixir ás múltiples deficiencias que afectan ao campo de fútbol de Agüeiros en Campañó, e que “comprometen a seguridade das persoas usuarias. O estado do campo é ruinoso, lamentable e perigoso”.
No ano 2018 o concello adxudicou este proxecto millonario á empresa ELSAMEX, proxecto que cualificaban como “unha das obras máis importantes no desenvolvemento do equipamento deportivo da cidade”. O campo púxose a disposición do concello para o inicio da tempada 2019/20.
A organización laborista sinala que neste campo adestran e compiten 16 equipos, a maioría formados por nenos e nenas, así como 5 conxuntos de veteráns, o que “supón un volume significativo de usuarios. Actualmente, o estado das instalacións é ruinoso, cun céspede artificial totalmente deteriorado e rachado, vestiarios afectados por graves problemas de humidade e co falso teito parcialmente desprendido, asentos rotos nos banquiños, e sen aparcadoiro nin acceso adecuado”. Consideran que estas deficiencias afectan directamente á seguridade das persoas usuarias, dificultando de maneira considerable a práctica deportiva.
Afirman ademáis que a situación non é illada, pois aseguran que se repite noutros campos de fútbol remodelados en datas recentes. Consideran inadmisible que na denominada “Cidade do Deporte” se presenten erros tan graves só tres anos despois da finalización das obras, “deficiencias que seguen sen corrixirse a día de hoxe”.
Solicitan unha actuación decidida do goberno municipal, a reparación inmediata destas deficiencias e unha inspección a fondo do resto dos campos de deporte municipais para garantir a práctica deportiva en condicións idóneas.