“Orgullo é loita. Orgullo é política. Orgullo é revolución.”
Chega outro 28 de xuño, e con el un novo Orgullo. Pero non é só unha celebración; é unha chamada á acción, unha trincheira de cores fronte aos que nos queren en silencio, ás marxes, no armario ou no medo. Porque o Orgullo naceu na rúa e segue vivo na rúa, loitando contra a violencia, contra a inxustiza, contra a desigualdade.
En Movemento Sumar Galicia, erguemos a bandeira multicolor coa convicción de que non hai democracia plena sen dereitos LGTBIQA+ garantidos, sen políticas públicas que nos recoñezan e protexan, sen igualdade real que se toque, que se sinta, que se viva. E dicímolo alto, con dignidade e coa forza da memoria colectiva: non imos recuar un paso.
Este non é un orgullo de escaparates, nin de maquillaxe institucional. É o orgullo que denuncia, que incomoda, que desborda, que esixe. Porque mentres nos matan, nos discriminan, nos invisibilizan, non hai nada que celebrar sen loita.
Interpelamos á Xunta de Galicia.
Porque os dereitos non se piden, esíxense.
A Lei galega 2/2014 está superada. E a Xunta leva máis dunha década sen movela, sen implementala, sen dotala de orzamentos reais. Mentres tanto, as agresións medran, os discursos de odio medran, e o abandono institucional tamén.
A nivel estatal avanzamos: recoñecemento da autodeterminación de xénero, medidas contra a LGTBIQAfobia, dereitos recoñecidos para as persoas trans, intersexuais, non binarias… Pero en Galicia seguimos cunha lei inoperativa e cun goberno que fai do atraso norma e da pasividade estratexia.
Por iso, esiximos:
1. Actualización inmediata e valente da Lei galega LGTBIQA+.
Unha nova lei que recolla os avances da lexislación estatal, que amplíe dereitos, que recoñeza todas as identidades e corporalidades, e que non se quede en boas intencións sen ferramentas nin recursos.
2. Creación dunha Dirección Xeral de Dereitos LGTBIQA+.
Con rango político, orzamento propio, persoal técnico especializado e capacidade real de acción transversal en toda a administración pública. A diversidade non pode seguir sendo unha nota ao pé na política galega.
3. Un plan integral contra a violencia LGTBIQA+ en Galicia.
Con puntos de atención nas sete grandes cidades e no rural, campañas de prevención e protocolos específicos para vítimas. Queremos vivir sen medo.
4. Educación afectivo-sexual obrigatoria, inclusiva e científica en todos os niveis educativos.
Formación continua para o profesorado, manuais adaptados e unha visión da sexualidade e do xénero desde o respecto, a liberdade e os coidados.
5. Garantía do acceso á sanidade para as persoas trans e intersex,
sen tutelas, sen listas de espera, sen discriminación.
Este manifesto é tamén un berro contra quen nos nega:
Contra a extrema dereita, que quere facer desaparecer as nosas vidas das aulas, das institucións, dos dereitos.
Contra quen, mesmo no goberno, dubida, recúa ou modera a defensa dos nosos dereitos para non incomodar.
Contra a mercantilización do Orgullo que o transforma nun produto sen memoria nin dignidade.
O Movemento Sumar Galicia di: NON.
Non ao recorte de dereitos.
Non á invisibilización das persoas trans, intersexuais e non binarias.
Non á Galicia conservadora que nos quere caladas.
Si a unha Galicia diversa, libre e radicalmente democrática.
Porque ser LGTBIQA+ é existir politicamente. Porque non hai neutralidade posible fronte á discriminación. Porque cada identidade disidente é unha semente de cambio. Porque o amor, os corpos, os afectos e as vidas diversas son tamén barricadas.
Hoxe, con orgullo, facemos política.
Con orgullo, facemos país.
Con orgullo, facemos revolución.
Movemento Sumar Galicia co Orgullo.
Sempre adiante, sen medo, con todas.